* بقالنا فترة كبيرة بنسمع حالات طلاق والأسباب كتير بس اكتر سبب شائع مابيصرفش على البيت مش بيشيل مسئولية .... ايه ؟ ليه ؟ ليه ان شاء الله ؟ اومال بتجوز ليه حضرتك ؟ ! 😒
لو حضرتك فاكر ان الجواز حب وتسبيل وحياتك هاتفضل زي ماهي مش هاتتغير تبقأة متتجوزش 😡
* في جيل كامل طلع معقد نفسيا بسبب تصرفات ابوهم مع أمهم والأمهات بتبذل مجهود خرافي عشان تعمل balance للي باظ في شخصيتهم في منهم بيتعلم من اللي بيشوفوه وفي بيتعقد ويصبح غير سوي ويوصل بينا الحال للي احنا شايفينه دلوقتي دة . 😱
* الكائن بقأة اللي عايش في البيت بيشتغل على عينا وراسنا وبيجيب فلوس ok ، بس البيت عايز فلوس بس ؟! .... لأ ..... البيت عايز أب يربي مع الأم عايز أب يشوف ولاده موهوبين في ايه ؟ اهتماماتهم ايه ؟ يخرج ويفسحهم .... على اد مقدرته طبعا ... أن شاء الله يمشيهم حوالين البيت شوية ، بس الكائنات اللي بكلم عنهم دول هم اللي بيفضلوا قعدة القهوة عن القعدة مع عيالهم ، قعدة الصحاب عن القعدة مع مراته ، موجود في البيت للأكل والنوم وأنه يلاقي هدومه مغسولة ... باشا قاعد في اوتيل .
* تيجي تسأله جربت تقعد مع مراتك يقول مراتي نكدية 😁 جرب أنت تقعد معها .. جرب تشيل معها المسئولية إغسل كوباية الشاي بتاعتك كدة ، حاول تصلح حاجة بايظة في البيت ، جرب كدة مش هاتشوفها نكدية هاتقدر والله .. مهي مش سوبر ومان يعني عشان تبقأة مربية ومدرسة ودكتورة وطباخة وغسالة ونجارة وسباكة وكهربائية و تيجي تلاقيها مبسوطة ومش نكدية .... إزاي دة ؟! دة حتى الحتة بتاعتك ومساحتك ومسئوليتك هي شالتها معاك ونزلت اشتغلت عشان تساعد في البيت يعني شالت معاااااك ماتشيل أنت كمان يا عم الحاج ولا ايه ؟😁
* تيجي بقأة لنوعية أحقر ويجي يقولك أنت بتعملي ايه طول النهار ؟ 😠 دة ع أساس أن البيت نضف الياً والأكل اطبخ الياً والعيال ذاكروا الياً ويجي يتفشخر ادام الناس أنا ابني جايب ٩٨% من غير دروس ، جربت أنت تقعد معاه وتذاكرله ؟ .... لأ ... جربت تقعد أسبوع تعلم تكتب حرف ال (ظ) ... لأ ... طيب جرب والنبي يا شيخ تجرب يمكن تجلط ونوعيتك تنقرض ونرتاح 😊
* التقدير .... التقدير يا جماعة كلمتك دي ممكن تهدها دة الكلمة الطيبة صدقة ... أنت تحب تتعب في الشغل ومديرك يقولك أنت بتعمل ايه طول النهار ؟ ها تحس بايه؟ ساعتها .. هاتضايق مش كدة ؟ مش بعيد ينقلوك ع المستشفى شوف دة حصل وانت راجل أقوى منها والكلمة جاتلك من حد غريب ميفرقش معاك ، اومال هي بقأة الأضعف والأرق دي قارورة يا عم الحاج ربنا عز وجل وصفها بكدة ... رفقاً بالقوارير ... وسمعاها من مين ؟ من حبيبها اللي المفروض ميجرحهاش ، اللي هي مسئولة منه .
* طيب تعالوا ننزل بالمستوى شوية كمان معلش ... في كائن يصرف ع الحشيش وما يصرفش ع البيت ، الست تطلب فلوس المصاريف البيت والعلاج والتعليم ويقولها معايش وتلاقي في جيبه حشيش .
طيب دة رااااااجل ؟! .... رااااجل منين ؟! 😠
* الأصعب من كدة تحكي لبعض الناس والست تعيط وتقول بيحشش ومابيدفعش مصاريف البيت ولا دروس العيال والناس ترد تقولك عادي كل الرجالة بتحشش ؟! 😱😱😱😱😱😱😱😱😱
انتوا بجد ؟ انتوا طبيعين يا جماعة ولا أنا اللي مش طبيعية ؟! انتوا إزاي كدة ؟ ! 😱😱😱
* الناس دي عايزة اقعدها في لجنة إمتحان واسئلها ١- ما فائدة الزواج ؟
٢- ما مفهومك عن الحياة الزوجية ؟
٣- ما هي الحالات التي يجوز فيها الطلاق ؟
إذا مكنتش دي الأسباب اللي هاطلق عشانها اومال هاطلق عشان ايه ؟ هاااا ايه ؟ 😠
* أنا مش بشجع ع الطلاق والله ولا بهاجم الرجالة ، انا بكلم على نوع معين من الذكور كثر وبشدة وكمية انهيار أسر مش مطلقين عايشين مع بعض عشان لا تحمل لقب مطلقة ولكن الأسرة منهارة والعيال ضايعة ، لأن الجو العام خناق ونكد وعدم تقدير .
* تحية مني لكل راااااجل متحمل مسئولية بيته زوج لمراته وأب لأولاده 🎩🎩🎩 وأنا بقول لكل ست جوزها متحمل المسئولية روحي اقفي كدة زي ميرفت أمين في حافية على جسر الذهب وقوليله بأعلى صوتك بحبك بحبك بحبك 😂😂😂... دة بس الراجل اللي يتقاله بحبك 💞 ، اللي تستأمنيه على عمرك وحياتك ، اللي غير كدة كفاية العمر اللي ضاع معاه وماضيعيش باقي عمرك وما يهمكيش من مجتمع عقيم أنشأ أجيال نكدية ومعقدة محدش فيهم حاسس بيكي ولا عايش قصتك .
